"Түптө айдоочудан пара талап кылган" деп шектелген Жол-кайгуул кызматынын инспекторунун иши сотко өткөрүлдү

"Түптө айдоочудан пара талап кылган" деп шектелип жаткан Жол-кайгуул кызматынын инспектору боюнча кылмыш иши иликтенип бүтүп, сотко өткөрүлдү. Бул тууралуу Башкы прокуратуранын басма сөз кызматы бүгүн, 12-сентябрда билдирди. 

Эске салсак, 6-июлда Ысык-Көл облусунда жол-кайгуул кызматкерине 10 миң сом пара бербеген айдоочу камакка алынганы тууралуу маалымат тараган. Түп районунун жол-кайгуул кызматкери Жыргалбек Саманов тосуп, маршруттук таксинин ээси Замирбек Жороевди "спирт ичимдигин ичкен" деген айып менен убактылуу кармоочу жайга камап, унаасын атайын токтотуучу жайга токтотуп койгону айтылган.

Бул боюнча коомчулукта кызуу талкуу жаралып, 7-июлда Түп районундагы ОшМУнун студенттери менен келе жаткан айдоочудан жол-кайгуул кызматкеринин пара талап кылуусу боюнча кызматтык иликтөө башталып, Жол-кайгуул кызматынын кызматкери Бишкекке чакырылып, кызматтан четтетилген соң анын күбөлүгү жана төш белгиси алынган. Кийин бул факт боюнча "кызмат абалынан пайдалануу" жана "пара талап кылуу" беренелери боюнча кылмыш иши козголгон.  

Аталган район боюнча Жол-кайгуул кызматынын ага инспектору Мурат Жумабаев 7-июлда SUPER.KG порталына студенттер менен келе жаткан айдоочудан пара алуу фактысы боюнча маалыматы жок экенин айтып, эреже бузган айдоочунун иши сотто караларын билдирген болчу.