Ош. Кара-Суу районунда турак үй курулуп жаткан жер тилкеден жерге көмүлгөн 203 мина табылды

Ош облусунун Кара-Суу районундагы Таштак айылында турак үй курулуп жаткан жер тилкеден жерге көмүлгөн 203 мина табылды. Бул тууралуу бүгүн, 15-сентябрда Коргоо министрлигинин түштүк-батыш кол башчылыгынын басма сөз кызматы билдирди.

Алынган маалыматка ылайык, жергиликтүү тургун Мухаммед Абжапаровдун жеке турак үйүндө суу агып кетүүчү жайды казуу учурунда жарылуу коркунучу бар заттар табылып, 13-14-сентябрь күндөрү жүргүзүлгөн иш-чаралардын жыйынтыгында У-ТМ-57 – 52 даана, У ТМ-62 М – 109 даана, У МВП-62 – 24 даана, У МВП-62 – 24 даана, У-ПВЗ–57 – 6 даана, У-ЩЗМ-72 – 6 даана, ошондой эле белгисиз үлгүдөгү 5 даана ок-дары алынган.

Миналар табылган объект тиешелүү чечим чыгарылганга чейин Таштак айылынын жергиликтүү инспекторлору тарабынан көзөмөлгө алынып, иликтөө иш-чаралары жүргүзүлгөн соң табылган миналар укук коргоо органдарынын кызматкерлери тарабынан жок кылынары айтылды.