Бишкекте "батир алып берем" деп 15тен ашык жаранды алдаган аял кармалды

Милиция кызматкерлери тарабынан алдамчы аял кармалды. Бул тууралуу Бишкек ШИИББинин басма сөз кызматы бүгүн, 15-сентябрда билдирди.

Маалыматка караганда, милиция кызматкерлерине Бишкек шаарынын тургуну кайрылган. Анда ал Назира аттуу аялдын "көп кабаттуу үйдөн батир алып берем" деп 42 миң долларын алып, ошол бойдон качып кеткенин айткан. Бул боюнча жүргүзүлгөн иликтөө иштеринин негизинде кылмышка шектүү кармалган. Алгач анын өздүгүн тактоо кыйынга турган. Анткени кылмышка шектүү 3 жолу аты-жөнүн өзгөрткөнгө жетишкен. Учурда ал Мэри Жумакова болсо, буга чейин Назира Кенжебаева, Назира Жумакова болуп жүргөн. Ошондой эле кылмышка шектүүнүн алдамчылык иш-аракеттеринен улам 15тен ашык шаар тургуну жабыркаганы белгилүү болгон.

Учурда кылмыш иши козголуп, тергөө амалдары жүрүп жатат. Эгерде кимде-ким аталган айымдан жабыркаса, 0 558 02-18-02, 0 553 10-28-32 телефон номурларына кайрылышса болот.