Алыс тууганы болгондуктан, үйлөнө албай калган кыргыз жигит Орусияда сүйүктүүсүн өлтүрүп, кыздын абийирин жашырганын айтты

Орусияда "жумушка кеткен бойдон дайынсыз" деп изделген кыргызстандык кыздын өлүмү боюнча иликтөө иштери жүргүзүлүп, соттук-медициналык экспертиза дайындалды. Кыздын сөөгү алты күн мурун мекенине жөнөтүлгөнүн 15-сентябрда КРнын Орусиядагы элчилигинин басма сөз кызматы билдирди. 

Маалыматка караганда, 4-сентябрь күнү Кыргызстандын Орусиядагы элчилигине Т.О. аттуу жаран кайрылып, 27-август күнү жоголгон О.к.П. аттуу кызын издөөгө жардам сураган. 

Жалал-Абад облусунун Таш-Көмүр шаарында 1994-жылы туулган кыз Новокасино районунда (Орусия) жумушуна кеткен боюнча дайынсыз экени айтылган. 

Элчилик тарабынан 6-сентябрда ММКлар аркылуу издөө салынгандан кийин Энтузиаст жолун оңдоп жаткандар токойдон жаш кыздын сөөгү табылганын билдиришкен. Полиция иликтөө жүргүзүп, кыздын үч күн мурун жан бергенин аныкташкан. 7-сентябрь күнү каза болгон жаран буга чейин изделип жаткан 20 жаштагы  О.к.П экени такталып, анын өлүмүнө шектүү катары маркумдун алыс тууганы, 1991-жылы туулган Б.А. кармалган. 

Туугандарынын маалыматына ылайык, Б.А. Москва шаарында кызга жолугуп, үйлөнүү ниетин билдирип келген. Бирок алардын алыс туугандыгы никеге турууга тоскоол болгон. Ага карабай кылмышка шектүү кызды үйлөнүүгө көндүрүүгө аракет кылган. 

Полицияга берген көрсөтмөсүндө шектүү кылмышын мойнуна алып, "Аны менен жолугууга барганда белгисиз адамдар аны зордуктап жатканын көрдүм. Ал намыстанып, ыйлап, өлтүрүүнү суранды. Анын кыйналганын көрүп суранычын четке кага алган жокмун" деген.