Эльвира Сариева: "Кургак учук социалдык кооптуу жугуштуу оору бойдон калууда"

Бүгүн, 19-сентябрда вице-премьер-министр Эльвира Сариева Чүй облусунун Ысык-Ата райондук Үй-бүлөлүк медицина борборунун иши менен таанышып, кургак учукту аныктоо жана амбулатордук деңгээлде дарылоо жыйынтыгы боюнча тегерек столго катышты. “Кургак учук социалдык кооптуу жугуштуу оору бойдон калууда. Бул илдетти амбулатордук деңгээлде дарылоо алгачкы деңгээлдеги тейлөө көрсөтүүнүн натыйжалуу болорун далилдөөдө жана оорулуулардын өз учурунда кайрылуусуна шарт түзөт. Мындай оңдуу тажрыйбаны Кыргызстандын жалпы саламаттык сактоо тутумуна жайылтуу керек",- деди ал.

Вице-премьер-министр Кыргызстандын эл аралык шериктерине кургак учукка каршы күрөш жана анын алдын алуу боюнча берген көмөгү үчүн ыраазычылык билдирди.