Жоомарт Оторбаев: "Элдин жашоо шартын жакшыртуу үчүн өкмөт эмне кылып жатканын жарандар билиши керек"

23-сентябрда Кыргызстандын премьер-министринин онлайн режиминдеги коомдук кабылдамасынын бет ачары болду. Видеоконференция аркылуу байланыш түйүнүнүн ачылышы ыкчам чара көрүү чечимдерин кабыл алууга жол ачып, убакытты үнөмдөөгө, өкмөттүн чечимдеринин өз убагында аткарылышын көзөмөлдөөгө мүмкүнчүлүк түзөт. "Өкмөттүн ишине элдин ишенимин ачыктык жана тунуктук аркылуу гана жогорулатууга болот. Ошондуктан өкмөт коомчулук менен байланышууга, эл жана ММКлар менен пикир алышууга өзгөчө маани берүүдө. Биздин жарандар жашоо шартты жакшыртуу үчүн өкмөт эмне иштерди жасап жатканын билип, түшүнүшү керек",- деди премьер-министр Жоомарт Оторбаев.