Парламенттин тармактык комитети Бажы биримдигине кирүүгө байланышкан 16 мыйзам долбоорун жактырды

Жогорку Кеңештин Экономикалык жана фискалдык саясат боюнча комитети 23-сентябрда Кыргызстандын Бажы биримдигине киришине байланышкан 16 мыйзам долбоорун карады. Комитет төрагасы Карганбек Самаков: "Бажы биримдигинин оң жана терс жактары боюнча комитеттин дарегине абдан көп кайрылуулар түшүүдө. Ошондуктан мамлекеттик органдардын, ишкерлер ассоциацияларынын кеңири өкүлчүлүгүн чакырып, ийри отуруп, түз кеңешели деп жыйын өткөрүп жатабыз",- деп билдирди.

Сунушталган мыйзам долбоорлору - Бажы биримдигинин талаптарына ылайык келтирүү максатында сунушталып жаткан документтер. Экономика министри Темир Сариев Бажы биримдигине кошулуунун оң-терс жактарына токтолуу менен депутаттарга сунушталып жаткан мыйзам долбоорлорунун маңызын чечмелеп берди. 

"Бүгүнкү күндө Бажы биримдигине кошулуу боюнча саясий чечим кабыл алынып, жол картасы бекитилген. Эми 2015-жылдын башына чейин мыйзамдарды Бажы биримдигинин талаптарына дал келтирүү милдети турат. Бажы биримдигине кошулуу менен соода-сатык жүргүзүүнүн, өндүрүштүн, бажы катнашынын тартиби өзгөрөт",- деди министр. 

Жыйында ишкерлер, мамлекеттик органдардын өкүлдөрү, фискалдык тармактын эксперттери өз сунуштарын айтышып, 16 мыйзам долбоору комитет тарабынан жактырылды.