Баткенде өткөн 6-республикалык театр фестивалынын жеңүүчүлөрү аныкталды

Баткен шаарында өткөн 6-республикалык театр фестивалы жыйынтыкталып, жеңүүчүлөр аныкталды. Фестивалга 15 театр катышкан. Маданият, маалымат жана туризм министрлиги бүгүн, 30-сентябрда билдиргендей, номинациялар боюнча калыстар тобунун чечими менен төмөнкүлөр жеңүүчү аталды:

1. Мыкты спектакль – Ш.Термечиков атындагы Чүй облустук драма театры койгон "Жамиля" спектакли (авт. Ч.Айтматов, реж. О.Айдаров);

2. Мыкты режиссёр – С.Ибраимов атындагы Ош облустук драма театрынын режиссёру Т.Апыев "Делбирим" аттуу чыгармасы менен.

3. Эркектин ролун мыкты аткарган актёр – К.Жантөшев атындагы Ысык-Көл облустук музыкалык драма театрынын актёру Элдияр Желденбаев;

4. Аялдын ролун мыкты аткарган актриса – С.Ибраимов атындагы Ош облустук драма театрынын актрисасы Айзат Сатыбалдиева;

5. Аялдын ролун мыкты аткарган экинчи пландагы актриса – М.Рыскулов атындагы Нарын облустук музыкалык драма театрынын актрисасы, КРнын Эмгек сиңирген артисти Бермет Өмүрова;

6. "Үмүт" номинациясына Т.Абдумомунов атындагы Кыргыз улуттук драма театрынын артисттери көрсөткөн театралдык мастер-классы ээ болду.