Кыргызстанда октябрда бензиндин баасы 3-5 пайызга көтөрүлүшү күтүлөт

Кыргызстанда октябрь айында бензиндин баасы 3-5 пайызга көтөрүлүшү күтүлөт, дизель майынын баасы өзгөрүүсүз калат. Бул тууралуу бүгүн, 2-октябрда Нефтетрейдерлер ассоциациясынын президенти Медетбек Керимкулов билдирди. Анын айтымында, Кыргызстандагы күйүүчү майдын баалары Орусия рыногунан түздөн-түз көз каранды, анткени бардык алып келинүүчү мунайзат Орусиядан ташылат. “Биздин божомолго ылайык, Орусиянын мунайзат рыногу турукташып, ишканалардагы баалардын өсүүсү байкалбайт. Бирок ишканалардагы баалар сентябрь айындагы эң жогорку деңгээлде калган. Учурда баалар жылдын башындагыдан 34-61 пайызга жогору”,- деди Керимкулов.