Бишкекте жаңы төрөлгөн ымыркайдын өлүмү боюнча иликтөө жүрүп жатат

Бишкекте №1-төрөт үйүнүн дарыгерлеринин шалаакылыгынын айынан жаңы төрөлгөн ымыркай каза болгон факты боюнча иликтөө иштери жүрүүдө. Бул тууралуу Бишкек ШИИББинен бүгүн, 6-октябрда кабарлашты.

Маалыматтарга караганда, милицияга 32 жаштагы Бишкек шаарынын тургуну кайрылган. Өз арызында аталган жаран кош бойлуу аялынын төрөтү башталганда №1-төрөт үйүнө алып баргандыгын, ал жактан дарыгерлер төрөт үйүндө орун жок экендигин айтышып, кабыл албай коюшкандыгын маалымдаган. Кийин аялын №2-төрөт үйүнө алып барганда дарыгерлер кесарево жолу менен төрөтүшкөн. Тилекке каршы, ымыркай каза болуп калган. Арыздануучу №1-төрөт үйүнүн дарыгерлерин күнөөлүү деп жатат. Анткени №2-төрөт үйүнө алып барганда курсактагы бала кыйналып калган.  

Учурда аталган факт боюнча укук коргоо органдары иликтөө жүргүзүп жатышат. Экспертизанын жыйынтыгы менен кылмыш ишин козгоо же козгобоо чечими чыгары белгилүү болду.