Улуттук коопсуздук мамлекеттик комитетинин жана Коррупцияга каршы кызматынын өкүлү 2000 доллар пара алып жаткан жеринен кармалды

Улуттук коопсуздук мамлекеттик комитетинин Баткен облусу боюнча башкармалыгынын бөлүм башчысы жана Коррупцияга каршы кызматынын өкүлү 2000 доллар пара алып жаткан жеринен кармалды. Бул тууралуу ИИМдин басма сөз кызматы бүгүн, 13-октябрда билдирди.

Маалыматка караганда, Ички иштер министрлигинин Уюшкан кылмыштуулук менен күрөшүү башкы башкармалыгына Өзбекстандын жараны кайрылган. Анда ал аталган кызматкерлер кылмыш жоопкерчилигине тартпоо үчүн 2000 доллар талап кылып жатканын айткан. Бул боюнча кылмыш иши козголуп, иликтөө башталган болчу. Кечээ, 12-октябрь күнү Кадамжай шаарына жакын жерде Улуттук коопсуздук мамлекеттик комитетинин Баткен облусу боюнча башкармалыгынын бөлүм башчысы жана Коррупцияга каршы кызматынын өкүлү пара алып жаткан жеринен кармалышты. Учурда тергөө амалдары жүрүп жатат.