Өкмөт "Жер-Үй" кенин иштетүүгө аракетин баштады

"Жер-Үй" кенин иштетүү жана кендин аянтын геологиялык жактан иликтөө максатында жер казынасын пайдалануу укугуна кайрадан сынак өткөрүү боюнча комиссия түзүлдү. Тийиштүү токтомго 13-октябрда премьер-министр Жоомарт Оторбаев кол койгонун өкмөттүн басма сөз кызматы билдирди. Токтомго ылайык, ведомство аралык сынактык комиссия бир айлык мөөнөттө сынакты өткөрүү шартын жана тартибин, ошондой эле жеңүүчүнү аныктоо талаптарын иштеп чыгып өкмөттүн бекитүүсүнө киргизүүгө тийиш. Кенди мурун иштетип келген казакстандык "Визор Холдинг" компаниясы лицензиясынан 2012-жылы ажыратылган. Буга компаниянын келишимдин талаптарын аткарбаганы себеп болгону айтылган. Аталган компания кыргыз өкмөтү менен соттошуп, өлкө сотторунун бардык инстанциясында утулган.