Орусияда жасалма паспорт менен качып жүргөн кыргызстандык жаран кармалды

Орусияда жасалма паспорт менен качып жүргөн кылмышкер кармалды. Бул тууралуу бүгүн, 15-октябрда ИИМдин басма сөз кызматынан билдиришти.  

Маалыматка ылайык, КРнын ИИМине караштуу 5-башкармалыгынын кызматкерлери тарабынан издөөдө жүргөн жаран Орусиянын аймагында жасалма документтер менен жүргөнү аныкталган. Жасалма паспорт менен жүргөн 1967-жылы туулган жаранга карата 2006-жылдын июль айында "бирөөнүн мүлкүн тартып алуу" беренеси боюнча кылмыш иши козголгон. Башкы прокуратура аны камакка алуу өкүмүн чыгарган. Кара-Суу районунун ички иштер башкармалыгы тарабынан ага издөө салынган болчу. Иликтөө иштеринин жүрүшүндө, 2009-жылы Мамлекеттик каттоо кызматынын Ош шаарындагы өкүлчүлүгү аталган жаранга аты-жөнү жана туулган жылы өзгөртүлгөн жаңы паспорт беришкени аныкталган. Учурда бул боюнча тергөө амалдары жүрүп жатат.