Бишкекте ажырашып кеткен аялынын инисин өлтүрүп кеткен жаран изделүүдө

Бишкекте ажырашып кеткен аялынын инисин өлтүргөн жаран изделүүдө. Бул тууралуу бүгүн, 20-октябрда Бишкек ШИИББинин басма сөз кызматынан билдиришти.

Маалым болгондой, кечээ, 19-октябрда саат 01:30дар чамасында Бишкек шаарынын Ленин РИИБинин нөөмөт бөлүмүнө шаардагы №4-ооруканада денесине бычак менен жаракат келтирилген адамдын каза болгондугу тууралуу маалымат түшкөн. Оор жаракаттан улам Ак-Ордо конушунун тургуну Т.Нурбек каза тапкан.  

Ак-Ордо конушунда жашаган эжеси, 27 жаштагы Р.Гүлкайыр түшүндүргөндөй, 19-октябрь күнү ал үйүндө уктап жатса, саат 00:10дор чамасында аны мурдагы жолдошу, 28 жаштагы С.Алымбек ойготуп, бычак менен коркутуп көчөгө алып чыгат. Ошол маалда иниси келип калат, ал эми Гүлкайыр күйөөсүнүн колунан жулунуп чыгып, үйгө качып барып жардам сураганга аракет кылган. Бир аз убакыт өткөндө тышка чыгып, инисине бычак сайылып жерде жатканын көрөт. Ал эми С.Алымбек из жашырып кеткен. 

Бул иш боюнча КРнын Кылмыш-жаза кодексинин 97-беренеси (киши өлтүрүү) менен кылмыш иши козголду. Учурда С.Алымбекти издөө боюнча ыкчам чаралар көрүлүүдө.