Оор жүк ташуучу унааларына нормадан ашыкча жүк жүктөгөн айдоочулардын жазасы күчөйт

Кыргызстанда оор жүк ташуучу унаалардын нормадан ашыкча салмактагы жүк жүктөө көйгөйү боюнча 22-октябрда өкмөттө жыйын өттү. Вице-премьер-министр Абдырахман Маматалиев жол өлкөнүн экономикалык жактан өнүгүшүнүн негизи экенин, өкмөт жаңы жолдорду курууну жана эски жолдорду жаңылоону күчөткөнүн айтты. Отурумга тийиштүү министрликтер менен мекемелердин өкүлдөрү катышып, жыйынтыгында төмөнкүдөй чечим кабыл алынды:  

1. Транспорт жана коммуникация министрлигине, Энергетика жана өнөр жай министрлигине, "Кыргыз көмүр" ишканасына унааларга нормадан ашыкча салмактагы жүк жүктөөгө болбой турганы боюнча жүк ташуучуларга тынымсыз түшүндүрүү иштерин жүргүзүү тапшырмасы берилди. Мындан тышкары оор жүк ташуучу унаалардагы жүктүн салмагына катуу көзөмөл салып, талапты бузган айдоочулардын жоопкерчилигин кароо милдети жүктөлдү.

2. Ички иштер министрлигине, Транспорт жана коммуникация министрлигине, Экологиялык жана техникалык коопсуздук инспекциясына Нарын облусундагы Кочкор районуна убактылуу пост коюу чечиминин долбоорун өкмөткө сунуштоо тапшырмасы берилди.