Аламүдүн районунда тамеки тартуудагы этиятсыздыктан улам турак үйдө өрт чыгып, апасы менен кызы каза тапты

Аламүдүн районунда өрт кырсыгы катталып, апасы менен кызы каза тапты. Бул тууралуу ӨКМнын басма сөз кызматы бүгүн, 4-декабрда билдирди.

Маалыматка караганда, өрт кырсыгы бүгүн түнү Кара-Жыгач айылынын Гагарин көчөсүндө жайгашкан турак үйдө болгон. Өрттүн кесепетинен турак үйдүн жыгач устундуу, шифер жабылган чатыры, үй эмеректери, кийим-кече жана документтер күйгөн. Мындан сырткары өрт болгон жерден үйдүн ээси, 1973-жылы туулган Үмөтбаева Эльвира Абаскановнанын жана анын кызы, 2011-жылы туулган Үмөталиева Касиет Тимуровнанын күйүп калган денелери табылган. Ошондой эле өрттүн кесепетинен үй ээсинин кызы, 2010-жылы туулган Тимур кызы Асият жана тууганы, 1963-жылы туулган Калдар Орозбаев колдорунан, буттарынан жана денелеринен III-А, Б даражада (денелеринин 20-30% күйгөн) күйүк алышып, Бишкек шаардык 4-ооруканасына жеткирилген. Өрттү өчүрүүгө 2 өрт өчүрүү бөлүмү тартылып, саат 02:50дө толугу менен өчүрүлгөн. Тилсиз жоонун чыгышына тамеки тартуудагы этиятсыздык себеп болгон.