Орусияда “мекендешин арматура менен сабап, акча талап кылган” деген шек менен эки кыргызстандык жаран кармалды

Орусияда “мекендешин арматура менен сабап, акча талап кылган” деген шек менен эки кыргызстандык жаран кармалды. Бул тууралуу ИИМдин басма сөз кызматы бүгүн, 5-декабрда билдирди.

Маалыматка караганда, 1-декабрь күнү Орусиядагы Кыргызстандын өкүлчүлүгүнө кыргыз жараны кайрылган. Анда ал 2013-жылдын декабрь айында Манас, Медя, Рус, Медетбек аттуу чала тааныш адамдар токойго алып барышып, арматура менен сабап, акча талап кылышканын айткан. Анын кесепетинен денесинен оор жараат алып, ооруканага жатып чыккан. Кийин Кыргызстанга кайтып келип, кайра Орусияга кеткен. 2014-жылдын 19-ноябрында аталган жарандар дагы тамагына отвертка такап, акчасын алып алышкан. 

Бул боюнча иликтөө иштери жүрүп, кылмышка шектүү катары 1993-жылы туулган Ж.М. жана 1991-жылы туулган Н.М. аттуу жарандар кармалышкан. Учурда алар убактылуу кармоочу жайга киргизилип, тергөө амалдары жүрүп жатат.