“No name” командасынын концертинде Мурат Жалиев ырчы Ильяз Абдыразаковдон интервью алды

"Тамашоу" долбоорунун 6-сезонунда чемпион болгон “No name” командасынын кезектеги жеке концерти баш калаадагы Спорт Ордосунда орун алды. Ордолуу Ош жергесинен келген команда жаңы программадагы номерлерди күлкү сүйүүчүлөрүнүн назарына коюшту. Мындан тышкары көрүүчүлөрдүн суроолоруна “Элестет”, “National”, “Ассорти” командалары менен биргеликте тамаша менен жооп кайтарышып, залды каткырыкка бөлөштү. Залда отурган кыздарды сахнага алып чыгып сынак уюштурушту. Анда “No name” командасынын капитаны Мурат Жалиев Орусияга кетип 6 ай бою дайынсыз жүрүп, үйүнө кайткан күйөөнүн ролун аткарды. Бул номер көрүүчүлөрдүн шатыра-шатман кол чабууларына арзыды. Команданы куттуктап ырчылар Айпери Кубик кызы, Данияр Эрматов, “Добулбас” тобунун жигиттери келишти. Ал эми ыр белек сунган ырчы Ильяз Абдыразаковдон Мурат Жалиев журналист катары интервью алууга да үлгүрдү.

Ырчы Ильяз Абдыразаковдун “No name” командасынын оюнчусу Мурат Жалиевге берген интервьюсунан:

Мурат Жалиев: - Канча ырыңыз бар?

Ильяз Абдыразаков: - 200 ырым бар.

Мурат Жалиев: - Хит болгон ырларыңыздан санап өтсөңүз...

Ильяз Абдыразаков: - “Азап”, “Жаным, ай”, “Багыттар”.

Мурат Жалиев: - Калганы ит болгон да, ээ?.. Каяктан кийинесиз?

Ильяз Абдыразаков: - “Бета-Сторес”, “Дордой-Плаза” дүкөндөрүнөн.

Мурат Жалиев: - Андан көрө үйүңүздөн кийинсеңиз болмок экен... Футболго кызыгасыз да. Дүйнөлүк футбол оюнчуларынан Роналдо жагабы же Мессиби?

Ильяз Абдыразаков: - Роналдону жактырам.

Мурат Жалиев: - Роналдону жакшы көргөнүңүздү аяшыбыз билеби анан?.. Кыска суроолор бар, ага тез-тез жооп беришиңиз керек. Кандай ат чөп жебейт?

Ильяз Абдыразаков: - Кусалуу ат.

Мурат Жалиев: - Жок, сүрөттөгү ат чөп жебейт. Кандай короз кыйкырбайт?

Ильяз Абдыразаков: - Уктап жаткан короз.

Мурат Жалиев: - Жок, туура эмес, бычылган короз кыйкырбайт. Уусу көп жылан?

Ильяз Абдыразаков: - Кобра.

Мурат Жалиев: - Жок, аялыңыз... Жакшы көргөн тамагыңыз?

Ильяз Абдыразаков: - Бешбармак, манты, аш, балык.

Мурат Жалиев: - Болбой калса “Роллтон”, ээ? Кышында да, жазында да бирдей кийимчен турган ким?

Ильяз Абдыразаков: - Балаты.

Мурат Жалиев: - Жок, “гаишниктер”... Бишкектеги эң “бардак” жер кайсы?

Ильяз Абдыразаков: - Базар болуш керек.

Мурат Жалиев: - Жок, Жогорку Кеңеш. Сүйүүгө ишенесизби?

Ильяз Абдыразаков: - Албетте, ишенебиз.

Мурат Жалиев: - Бул дагы “лох” экен да...