Мелис Турганбаев Ош аэропортунан 5,6 миллион доллар тоногон каракчыларды издөөнү өз көзөмөлүнө алды

Ички иштер министри Мелис Турганбаев Ош аэропортунан 5,6 миллион доллар тоногон каракчыларды издөөнү өз көзөмөлүнө алды. Бул тууралуу министрликтин басма сөз кызматы SUPER.KG порталына бүгүн, 5-январда билдирди. Ал эми ишти иликтөөнү ИИМдин Уюшкан кылмыштуулук менен күрөшүү башкы башкармалыгынын түштүк бөлүмү алып барууда.

Бир апта мурун маалымдалгандай, Ош аэропортунан 5,6 миллион доллар менен кошо уурдалган жаран табылып, суракка алынган. Аны уурдагандар Араван районунун аймагына таштап кетишкен. Ал ата мекендик компаниялардын биринин Руслан аттуу кызматкери болуп чыккан.

Айта кетсек, 27-декабрда бет кап кийген, куралчан беш адам Ош аэропортунун VIP-залына кирип, акча салынган үч-төрт баштыкты жана бир адамды өздөрү менен кошо уурдап кетишкен. Алардын колдорунда Калашников автоматы, Макаров тапанчасы жана видеокамералар болгон.