Орусияда "көк патент" алган мигрант документте белгиленген мөөнөткө чейин эмгектене алат

Орусияда юридикалык жак катары (юридическое лицо) иштеген чет өлкөлүк жаран анын иштөөгө уруксат кагазында белгиленген мөөнөткө чейин эмгектене алат. Бул тууралуу бүгүн, 21-январда Орусиянын Миграция кызматынын башчысынын орун басары Анатолий Кузнецов интернет аркылуу түз байланышта билдирди.

Кыргызстандык жаран ага төмөнкүдөй суроо берген: "Мен Кыргызстандан боломун. Менин иштөөгө уруксатым бар. Анын колдонуу мөөнөтү үстүбүздөгү жылдын август айында аяктайт. Мен юридикалык жак катары иштейм. Документтерим уюм аркылуу даярдалган, анткени мага "иштөөгө уруксат кагазы менен юридикалык жакта эмгектенгенге укугуң жок" дешкен. Суроом: текшерүү учурунда колумда кандай документтер болушу керек?"

"Сиз мындай уруксат кагазынын негизинде анын мөөнөтү аяктаганга чейин иштей аласыз. Демек, 2015-жылдын августуна чейин. Андан соң юридикалык жак катары патенттин негизинде эмгектенишиңиз керек. Текшерүү учурунда колуңузда иштөөгө уруксат кагазы же патент (эгер патенттин мөөнөтү узартылган болсо, патенттин мөөнөтүн узартуу жөнүндө квитанция) жана миграциялык карта болушу керек",- деп жооп беришти Миграция кызматынан.

Айта кетсек, Орусиянын жаңы мыйзамдарына ылайык, физикалык жак катары (физическое лицо) эмгектенген мигрантка патент кызыл түстөгү бланкта, ал эми юридикалык жак катары (юридическое лицо) эмгектенгендерге көк түстөгү бланкта даярдалат.