Борбордо кызамык оорусунун күч алышына байланыштуу түз байланыш телефону иштөөдө

Бишкек шаарынын Саламаттыкты сактоо департаментинде кызамык оорусу күч алгандыгына байланыштуу түз  байланыш телефону иштөөдө. Бул тууралуу бүгүн, 22-январда шаардык мэриядан билдиришти. 

Маалыматка ылайык, азыркы тапта Саламаттыкты сактоо департаментинде оорунун күч алышына жол бербөө жана алдын алуу боюнча атайын штаб түзүлгөн. Шаар тургундарынан жана конокторунан кызамык оорусуна шектенүүлөр болсо, (0312) 31-87-72, 31-88-24 номуруна кайрылууну өтүнөт. 

Ошондой эле учурда бул оорунун алдын алуу максатында Үй-бүлөлүк медицина борборлорунун башчыларына тапшырмалар берилип, күн сайын билим берүү мекемелеринде окуучулар тиешелүү текшерүүдөн өтүшүүдө. Андан сырткары мугалимдерге класстык сааттарды жана кызамык оорусунун алдын алуу боюнча ата-энелер чогулушун өткөрүү тапшырмасы берилген. 

Кызамык - катуу кармай турган жугуштуу оору. Анда эт ысып, жөтөлүп, мурун бүтүп, үн каргылданат, көздүн, ооздун былжыр чели сезгенип, териге кызыл бүдүрлөр чыгат. Муну вирус козгойт. Оорулуу чүчкүргөндө, жөтөлгөндө анын шилекейи, какырыгы менен вирустар абага тарап, соо адамга өтө тез жугат. Кызамык менен бардык кишилер оорушат. Ооругандарда туруктуу иммунитет пайда болот. Көбүнчө 5 жашка чейинки балдар оорушат. 3 айга чейинки бала демейде оорубайт, анткени ага бала кезинде ооруган эненин иммунитети берилет. Бала кезинде кызамык менен оорубаган энеден төрөлгөн балдар 3 айга чейин деле ооруп калышы ыктымал.