“Катуу сабалган 2 жаштагы бала күнүгө 150 граммдай шорпо ичип калды, жылыш бар” дейт дарыгер

Катуу сабалып, зордукталган 2 жаштагы баланын абалында аз да болсо жылыш бар. "Ал өзүнө келе элек, бирок азыркы тапта күнүгө 150 граммдан шорпо берип жатабыз",- деп билдирди бүгүн, 27-январда SUPER.KG порталына борбордогу Шаардык медициналык тез жардамдын балдар клиникалык ооруканасынын жандандыруу бөлүмүнүн жетекчиси Альберт Кагарлицкий.

"Ал ооруканага түшкөндөн кийин 3-4 күн өткөндө аны дем алдыруучу аппараттан чыгарганбыз. Ошондон бери ал өз алдынча дем алууда. Бирок ал дале өзүнө келе элек. Бир нече күндөн бери биз ага бир күндө 3 жолудан кашык менен 50 граммдан шорпо ичире баштадык. Андан башка анын абалынан олуттуу өзгөрүү байкала элек. Учурда дарыгерлер баланы мээнин комасынан чыгаруу үчүн бардык аракеттерди жасоодо. Буюрса, жакынкы убакыт аралыгында ал сакайып кетет",- дейт А.Кагарлицкий. 

Эске салсак, 2015-жылдын 11-январга караган түнү шаардагы балдар ооруканасына 2 жашар бала оор абалда жеткирилген. Анын денесинде көптөгөн жарааттар болгон. Кийин жүргүзүлгөн соттук-медициналык экспертизадан баланын зордукталганы аныкталган. Күч органдары тарабынан бул кылмышка шектүү катары баланын тууганы кармалган. Ал 2 жаштагы баланы сабаганын моюнуна алып, бирок баланы зордуктаганын четке кагууда. Буга удаа эле кылмышка шектүүнүн жубайы да камакка алынган. Ал эми 2 жаштагы бала 11-январдан бери комада жатат.