Өкмөт башчы Алмазбек Атамбаев быйылкы жылдын бюджетинин жыртыгын бүтөй албай, өзү айткандай, “тилемчидей акча сурагандан” тажаган өңдөнөт. “Акыркы 10 жылда “Центерра” компаниясы 250 тоннага жакын алтын өндүргөн. Анын баасы 10 миллиард доллардан ашуун турат. Мамлекет өлкөнүн кызыкчылыгы үчүн компаниянын активдерин башкарышы зарыл. Биз “Центерранын” акчасын пайдалануунун ордуна тилемчидей акча сурап жүрөбүз”,- деди Атамбаев мырза.
Экинчиден, өкмөт башчы Бажы союзуна баары бир кошулууга туура келерин билдирди. Аталган союз Орусия, Казакстан жана Беларустан турат. “Биздин башка жолубуз жок. Анын кемчиликтери көп дешүүдө. Бирок Бажы союзуна кирбесек, кемчиликтер андан да көбөйөт”,- деди өкмөт башчы. Эл арасында “Бажы союзуна кирсек, “Дордой” жабылат, Кытайдан товар алып келүү оорлойт, Германия, Япония сыяктуу өлкөлөрдөн машина алып келүүгө мүмкүн болбойт” деген сыяктуу сөздөр бар.