Каржы министри Чоробек Имашев менен Социалдык коргоо министри Дүйшөналы Мамасалиев иштебей жатып кызматынан баш тартышты. Мамасалиев мырза ашыкча ызы-чуусу жок кетсе, Каржы министринин креслосу “майлуу” эмеспи, жаңжалга айланганы аз калды. Имашевдин “бюджетте мугалимдердин айлыгын көтөрүүгө акча жок” деген ачык сөзү көбүнө жакпай, Жогорку Кеңештин жыйынына келген сайын депутаттардын “тепкисинде” калып жатты.
Быйылкы жылдын бюджети депутаттар тарабынан бекитилип бүтө электе Каржы министринин “өз эрки менен” кызматтан кетиши көп суроолорду пайда кылды. Ошентип, эки финансисттин тирешүүсүндө министри жеңилип, депутаты жеңип чыккандай болду. Дегенибиз, бюджеттик көзөмөл ЖКдагы “Ар-намыс” фракциясынын колунда. Комитетти мурунку Каржы министри Акылбек Жапаров жетектейт. ЖКга келген сайын Имашевдин айласын кетирген да Жапаров мырза болуп жаткан. Эми “жаңы Каржы министри талап кылынат” деген жарыянын алдына “120 кишиге туруштук бере алчу иммунитетке ээ адам зарыл” деп жазышпаса болгону.