Ливияда жарандык согуш башталып, өлкө эки лидердин ортосунда калды. Учурда чыгыш тарабы өкмөткө каршы күчтөрдүн колун­да болсо, ал эми борбор шаар Триполи Ливиянын лидери Муаммар Кадда­фи­нин көзөмө­лүндө. Каддафиге атаандаш болгон оппо­зиция Өткөөл өкмөттү курап, анын башчы­лыгына Абуд ­Ажлейль келди. Күн санап аларды колдоочулар көбөйүүдө.
Эл аралык ММКлардын маалыматына ылайык, бул аралыкта Муаммар Каддафинин учагы Беларустун аймагына келип кеткен. “Аны менен лидердин туугандары Беларуска учуп келишкен” дешүүдө. Ал эле эмес, башка дагы бир учак менен Каддафинин байлыгы
(3 миллиард долларга бааланган акча, алтын жана бриллиант) алынып келинген. Бирок бул сыяктуу ММКлардын маалыматын Беларустун ТИМи “чындыкка дал келбейт” деп билдирди.
Өлкөсүнө батпай калган ажолорду багып алууга көнүп калган Беларустун президенти Александр Лукашенко “куулган лидерлердин лагерин” ачууга ниеткер сымал. Буга чейин Кыргызстандын экс-президенти Курманбек Бакиевди чакырып алса, эми “Каддафи бала-чакасы менен Беларуска көчөт имиш” деген сөздөр тарай баштады.