Соңку аптада эле Кыргызстандын жаза өтөө мекемелеринде 3 жолу өзгөчө кырдаал катталган. Алардын ичинде абактан качуу жана адам өлтүрүү аракеттери да бар. Алсак, Аламүдүн районундагы Молдовановка айылында жайгашкан №27-колонияда мөөнөтүн өтөп жаткан кылмышкер күндүз эле качууга аракет кылган. “Мындай көрүнүш өлкөнүн тарыхында биринчи жолу катталып жатат” дешет түрмөнүн кызматкерлери. Андан башка №10 (Жалал-Абад шаары) жана №16 (Беловодск айылы, Москва району) жаза өтөө колонияларында да абактагылар арасында баш аламандыктар болуп өткөн. “Мындай баш аламандыктар кримавторитет Камчы Көлбаевдин буйругу менен уюштурулду” деген маалымат бизге келип түштү”,- дейт Мамлекеттик жаза аткаруу кызматынын башчысынын орун басары Камчы Качкыналиев. Себеби мындай баш аламандыктардан кийин түрмөлөрдө текшерүү жүрүп, кылмышкерлерди ич ара башкаруучу күчтөр да алмашат. «Ал муну менен буга чейин түрмөлөрдө өз өкүмүн жүргүзүп келген Азиз Батукаевден бийликти тартып алууну көздөгөн» дешүүдө.