10-майда Жогорку Кеңештин Коргоо жана коопсуздук комитетинин отурумунда кыргыз-тажик өкмөттөрүнүн ортосундагы жер тилкелерин өз ара бөлүү жөнүндө макулдашууга өзгөртүү жана толуктоо киргизүү боюнча протоколду ратификациялоо маселеси каралды.
Бул отурумда аталган комитеттин төрагасы, КСДП фракциясынын депутаты Исмаил Исаков: “Биз макулдашуу талабын аткарып, Тажикстанга 49 жылга 90 гектар жерди ижарага бердик. Бирок анын ордуна Кыргызстан үчүн ыңгайлуу деген 5 гектар жерди ушул күнгө чейин ала албай жүрөбүз. Демек, макулдашуу аткарылбаган соң кыргыз өкмөтү талап коюшу керек. Эгер талап аткарылбаса, 90 гектар жерди кайтарып алуу зарыл”,- деген оюн билдирди. Натыйжада Жогорку Кеңештин Коргоо жана коопсуздук комитети макулдашууга өзгөртүү жана толуктоо киргизүү боюнча протоколду ратификациялоого каршы чечим чыгарды. Эскерте кетсек, бул макулдашууга Ош шаарында 2009-жылдын 27-декабрында кол коюлган.