Ызырынган, кан жалаткан, токмок жеген, ошондой эле “кокуй, өлтүрөт” деп айгай салган депутаттардын ЖКдагы жашоосунан бир сүртүм.

Унутуп эле калбасак, Жогорку Кеңештин биринчи жыйыны опурула туруп, төрагага карай ызырынган депутат Анвар Артыков менен эсте калган. КСДПчы Курсан Асанов арага түшпөсө, бул Анвар акебиз “ата мекенчи” аксакалды аңтара коймок беле, ким билсин. Ушул эле “Ар-намыстын” 10 депутаты лидерин таштай, коалициялык көпчүлүккө ыктап кеткени да көңүлдөн сыртта калбайт.
Андан ары “ата журтчулар” элдин оозунан түшпөдү. Камчыбек Ташиевдин түшүнө Сулайман менен Сулеймандын балдары киргидей эле болду. “Бабановчу” Алтынбек Сулайманов ачууга алдырып жибергенин байкабай калган чыгар, калпакташып жатып элдешишкен. Кылмыш жоопкерчилигине тартылышы мүмкүн болуп турган Камчыке партиялашы Бахадыр Сулеймановдун да тилин тааптыр.
Кезек эми “ата мекенчилерге” жетти. Өмүрбек Абдрахманов менен Карганбек Самаковду карап отурган адамга алар партия ичиндеги өздөн чыккан жатка айланып бара жаткандай туюлат. Айрыкча Карганбек мырза партия лидеринин кадыр-баркына доо кетирүүнү көздөп иш тутуп жаткандай.
Минтип бири-бири менен жаакташып, мушташкан депутаттардын фонунда КСДП «койдон жоош» көрүнөт. Же алар териштирүүлөрүн тымызын өткөрүшөбү?