Президенттик шайлоонун күнүн аныктамай накта “Санта-Барбара” сериалына айланды. Эске салсак, депутат Камчыбек Ташиев президент Роза Отунбаеванын мөөнөтүн дагы бир жылга узартуу сунушун киргизсе, мамлекет башчы бул сөздү какшык катары кабыл алганын айткан. Ал эми былтыркы жылдагы Конституциялык кеңешменин бараандуу мүчөсү, өкмөттүн ЖКдагы экс-өкүлү Данияр Нарымбаев менен Баш мыйзамдын “атасы” Өмүрбек Текебаев кыйла эле бири-бирин калчылдатышты. Ошол талаш күчөп отуруп, өкмөттүн Жогорку Кеңештеги өкүлү Данияр мырза бул аптада кызматынан кол жууду. Ал “президенттик шайлоо 20-ноябрда өтөт” деп ашыкча жүктү мойнуна артып алып, таскагы катуу чыгып келе жаткан жеринен мүдүрүлдү.
Ошентип, Элдик референдумдагы шарт аткарылмай болду өңдөнөт. Анда “президенттин мөөнөтү бүтөрдөн эки ай мурун шайлоо болуп өтүшү керек” деп жазылган.