Ысык-Көл облусуна караштуу Бостери айылында орун алган “Асыл-Таш” пансионатында 4-июль күнү милиция кызматкерлери менен жергиликтүү балдар тобунун ортосунда кагылышуу болуп өттү. Эки тарап тил табыша албай, окуя чатакка айланган соң милиция кызматкерлери топтогу эки балага ок чыгарууга аргасыз болушкан. Ошол эле учурда милиция кызматкерлери да токмок жегендиги айтылды. ИИМдин маалыматына таянсак, кызуу кандуу жана криминалдык чөйрөгө аралашкан жигиттер алардын тапанчасын тартып алууга аракеттенишкен. Ал эми жергиликтүү калктын айтымында, милиция кызматкерлеринин ичинен бирөө окуя болгон жерге мас абалында келиптир. Учурда тирешүүнүн тегерегиндеги далилдерди аныктоо үчүн тиешелүү чаралар көрүлүүдө.
Ысык-Көлдүн тургундары үчүн сезондун тынч өтүшү өтө маанилүү. Туристтик агенттиктер бул жагымсыз окуя сезонго терс таасирин тийгизиши мүмкүн дешүүдө. Эскерте кетсек, “Асыл-Таш” пансионаты депутат Равшан Жээнбековдун жубайына тиешелүү.