БШКнын төрү талашка түшүп,
эски-жаңы төрагалар Акылбек Сариев менен
Туйгуналы Абдраимов күлкүгө калды.

Аптанын алгачкы күнү эле Борбордук шайлоо комиссиясынын төрүн талашмай менен башталды. Анын эски жана жаңы курамы тирешип, эки төрага кресло үчүн жаман-жакшы айтышты. Акырында эски төрага креслосун бошотуп берүүгө аргасыз болду. 
Ошентип, “дүйнөдө болуп көрбөгөндөй таза шайлоону өткөргөн” Акылбек Сариев айрым депутаттардын “жардамы” менен кызматынан кол жууду. Канчалык президент Роза Отунбаева ал үчүн чеп болбосун, баары бир “жарабайт” деп тиштенип алган эл өкүлдөрүнүн элегинен өтпөдү. Бирок мамлекет башчы анын талапкерлигин кайрадан сунуштады. Балким, 8-июлда өтүүчү Жогорку Кеңештин кезексиз жыйынында өтүп кетет чыгар.
Айтмакчы, Туйгуналы Абдраимов БШКны буга чейин Бакиевдин кезинде да башкарган. “Ар-намыстын” арты менен жаңы кызматка келген төрага журналисттердин “жакында өтүүчү шайлоо таза болобу?” деген суроосуна эмитеден ийинин куушура “бардык нерсе бизден эле көз каранды эмес” деди.