Коомдун назарында ЖКнын төрагасы Ахматбек Келдибеков менен кеткен делегациянын Түштүк Чыгыш Азияга барган сапары. Ага бюджеттен 10 миллион сомдон ашуун акча кеткендиги айтылууда.

“Спикер Ахматбек Келдибеков Малайзия жана Индонезияга “Кыргызстан” авиакомпаниясынын учагы менен 40 депутатты учкаштырып, Бали аралына бир аптага чардаганы кетти” деген сөз дуу эле тарады.
ЖКнын делегациясы 10-17-июль күндөрү расмий сапары менен Малайзия жана Индонезияга кетишкен. Жөнөкөй каттам менен эмес, литердик каттамды, башкача айтканда, аларды гана ташуучу атайын учакты жалдашыптыр. Ал эми Президент Роза Отунбаева чет мамлекеттерге барган көпчүлүк сапарларында катардагы эле каттам менен учуп жүрөт. Айтмакчы, буга чейин бай деп айтылган Малайзиянын спикери деле 5-6 депутаты менен эч кандай учакты өзүнчө ээлебей, жөнөкөй каттам менен келип кеткен.
Экинчиден, «депутаттардын саны – 40 эмес, 15»,- деди ЖКнын басма сөз кызматы. Бирок бул эч нерсени өзгөртпөйт. Эмне үчүн депутаттарды өзүнөн көп коштоочу ээрчип алган? Анын ичинде Ахматбек Келдибековдун жубайы жана дарыгери да бар. Интернет сайттарда буга байланыштуу: “Бала-чакасын, тууган-туушкандарын, ит-мышыгын деле ээрчитип алса болмок экен”,- дешүүдө.
Үчүнчүдөн, эмне үчүн депутаттар эс алуу учурунда расмий сапарга барышат? Алардын иши мыйзам чыгаруу эмеспи? Анда өкмөт эмне кылып отурат?
Бали аралы боюнча айтсак, ал жерге конуп кетүү сунушу болуптур. Элдин камын ойлогон биздин депутаттар каражатты үнөмдөйлү деп баш тартышкан. Буга “оп, бали” дейли. Тилекке каршы, бул актануу да жарабайт. Бали бир арал, ал эми алар барган мамлекеттин өзү курорттук зонага кирет. Экзотикалык мамлекетке жөнөшөрдө эле депутаттардын «дүңүнөн» жөнөп бергени кызык баарынан.
Өткөндө “Ата Мекендин” лидери Өмүрбек Текебаев «Роза Отунбаева айылчылаганын токтотсун» деген болчу. Эми башкы “ата мекенчи” кесиптештерине кандай сын айтар болду экен?
Кезектеги депутаттардын акылга сыйбаган жоругун эл кандай кабыл алат? “Делегациянын курамын кыскартып, катардагы каттам менен учса болот беле?” деген суроолор алар келгенден кийин нөшөрдөй жааса керек.