20-июлга караган түнү саат 01:30 чамасында Баткен облусунда күчү 7-8 баллга жеткен катуу жер титирөө болуп өттү. Зилзаланын очогу Баткен шаарынан 52 чакырым алыстыкта жайгашкан Совет айылында катталганын Өзгөчө кырдаалдар министрлиги билдирген. Жер титирөө муну менен эле токтолуп калбай, бир сааттан кийин 3,5 балл менен кайталанган. Алдын ала маалыматтарга ылайык, табигый кырсыктан көз жумгандар болгон эмес. Бирок жарака кеткен турак үйлөр көп. Учурда алардын саны такталууда.
Сейсмология институтунун директору Канат Абдрахматовдун айтымында, Баткен облусунда болуп өткөн зилзала Казакстандын Алматы шаарын (3 балл) жана Өзбекстандын борбору – Ташкентти (6 балл) кошо титиреткен. “Чоң аймактагы жер титирөө күчтүү болгону менен, зилзаланын очогу терең эмес жана калк жашабаган жайда орун алган”,- деди ал.
Бул жер силкинүүдөн Өзбекстандын Андижан жана Фергана облустарында 13 киши каза болду. Андан тышкары 80ге чукул адам жаракат алып, 35и ооруканага жаткырылган.
Коңшу Тажикстандын Өзгөчө кырдаалдар министрлиги билдиргендей, силкинүү учурунда Худжанд шаарынын бир тургуну коркуп кетип, терезеден секирип кеткенден кийин каза тапты.
Маалымат үчүн: Фергана өрөөнү Борбордук Азиядагы калк эң жыш жайгашкан аймак катары таанымал. Сейсмология институту Кыргызстандагы сейсмикалык активдүүлүк 2016-жылга чейин созуларын кабарлады.