Жоон топ коштоочулар менен Түштүк Чыгыш Азияга барам деп балээге калган Ахматбек Келдибеков эми Түркияга аттаныптыр. Бул ирет коштоочусуз, тымызын.

Жогорку Кеңештин төрагасы Ахматбек Келдибеков баш болгон делегациянын Түштүк Чыгыш Азияга атайын учак менен барып келгени катуу сынга алынды эле. Коомчулук депутаттардан коштоочусу көп сапарды жактырган эмес. Эми “ЖКнын шефи тымызын Түркияга учуптур” деген кеп тарады. Бийликтеги маанилүү үч адамдын бири болгон спикердин белгисиз кеткени дагы чууну жаратты. Аңыз кепти төраганын жардамчылары башында жокко чыгарып, “Бишкектеги эле үйүндө отурат” дегенче шашышкан. Шибегени капка ката албай калганда гана “Ахматбек Келдибекович Түркияга эс алуу үчүн кетти” дей башташты.
«Спикердин элге билгизбей тымызын жөнөп кетишине эс алуу эмес, Камчы Көлбаев жакындары менен Араб Эмираттарында кармалышы себеп болду. Төрага Бишкектен түз Эмираттарга жөнөөдөн жазганып, из жазгыруу максатында Түркияга кетти. Ал жактан Эмираттарга сапар алат» деген жоромолдор айтылууда. Эсиңиздерде болсо, кышында «Ахматбек Келдибеков Камчы Көлбаев менен «Капризде» жолугушту» деп чуу көтөрүлгөн. «Ал жолугушууну кримавторитеттер видеого тартып алышкан, спикерди тизгиндеп туруш үчүн» деген кептер да чыккан эле. Төрага мындай табышмактуу сапары аркылуу Камчы Көлбаев менен байланышы бар деген ушактарга жем таштап койду.