“Водолаз” деген каймана аты бар Максат Абакиров боштондукка чыккандан бери “Атамбаев чыгарыптыр, жакында ал “мыйзамдагы ууру” болот экен” деген имиштер туш тарапты каптаган. “Ачык саясат” гезитине берген маегинде Максат Абакиров ушул күнгө чейин кандай турмушту башынан өткөргөнүн жана Кыргызстандагы менмин деген ар бир саясатчыга карата өз оюн ачык билдириптир. “Биринчиден, Алмазбек Атамбаев мени колдосо, мен он бир түрмөдө отурбайт болчумун. Мыйзамдын негизинде соттун чечими менен чыктым”,- дейт ал.
Эскерте кетсек, Максат Абакиров былтыр УКМК тарабынан камакка алынып, Биринчи Май райондук соту аны 2 жыл 4 айга эркинен ажыраткан. Бирок УКМКнын СИЗОсунда жаткан ар бир күнү үч күндөн эсептелгендиктен, жаза мөөнөтү эртерээк аяктады.
Маекте бир кызыктуу жагдай белгиленген: “Турсунбек Акун мени Медет Садыркуловго алып кирип калды. Ал мага “мен сени “мыйзамдагы ууру” же Кыргызстандын президенти кылам” деди. Ошентип, мени ал киши Москвага, окууга жөнөттү”. Эгерде бул айткан сөзү чын болсо, маркум Медетбек мырза Ак үйдө отуруп, ушунча иштин башынан чыгуу менен бекеринен “серый кардинал” аталбаган экен дейсиң аргасыздан.