Ушул кезге чейин коомчулукта “Кремль кыргыз өкмөтүн жактырбай, ага далысын салып калган имиш...” деген жөө жомоктор айтылып келгени маалым. Бирок мунун баары чындыкка коошпогон “легендалар” экенин турмуш өзү ырастоодо. РФ Президентинин Администрация жетекчиси Сергей Нарышкиндин Кыргызстанга жасаган расмий визити буга далил.
Сергей мырзанын бул сапары КРнын Эгемендүүлүгүнүн 20 жылдыгына туш келип, анда ал залкар жазуучу Чыңгыз Айтматовдун айкелинин ачылыш аземине катышты. Ошондой эле салтанат учурунда Чыңгыз агабыздын чыгармачылыгы кыргыз- орус алакасын чыңдоого зор өбөлгө түзгөнүн баса белгилеп өттү. “Айтматов орус адабияты менен ажырагыс байланышты сезип, кыргыз жана орус элдеринин ортосундагы байланыштын сактоочусу болгон”,- дейт ал.
Андан соң өкмөт башчысы Алмазбек Атамбаев менен жолугушуп, бир катар маанилүү маселелердин тегерегинде баарлашышты. Сөз арасында алдыдагы президенттик шайлоо тууралуу кеп козголуп, Орусия тарап 30-октябрга белгиленген саясий өнөктүктүн тынч өтүшүнө кызыкдар экенин жашырган жок. Мына ушунун өзү Москванын биздин өкмөткө көзү түз экенин айгинелейт. Айрым күчтөр божомолдогондой, Орусиянын кыргыз бийлигин “чанганы” чын болсо, анда президент Дмитрий Медведевдин оң колу болуп саналган фигура Бишкектин богососун аттайт беле? Кыргызстандын Эгемендүүлүк майрамына катышып, тилектештигин билдирмек беле? Андыктан Нарышкиндин бизге келип кетиши жогорудагыдай жөө жомокторго чекит коёруна ишеним артып туралы.