Булгаары сырт кийимдин жумушка, конокко барганда же болбосо жөн гана сейилдөөгө кийип жүрүүгө ыңгайлуу экени талашсыз. Бүгүнкү саныбызда сиздер менен дал ошол булгаары сырт кийимдерге туура кам көрүү жана аларды тазалоонун сырлары менен бөлүшмөкчүбүз.

КАНТИП КАМ КӨРҮҮ КЕРЕК?

• Жаңы сатып алынган булгаары буюмдарга тиешелүү өз­дүк жыты болот. Эгер сиз сырт кийимиңиздин андай жытынан арылгыңыз келсе, анда майдаланган кофени кийимиңизге сээп, бир күн таштап коюңуз. Андан соң щётка менен тазалайсыз.

Эскертүү! Ачык түстөгү булгаары кийимдерге кофе себүү – анын өңүнүн өзгөрүшүнө алып келиши ыктымал. Андыктан кофени кийимдин ички бетине гана себиңиз.

• Ошондой эле жаңы булгаары кийимиңизди кийип сыртка чыгардын астында аны атайын май менен майлап алганыңыз оң. Ал сиздин сырт кийимиңизди суудан жана булгануудан сактайт.
• Нөшөргө кийүүдөн ка­чыңыз. Капысынан жамгырда калып калсаңыз, суу болгон булгаары сырт кийимиңизди кургак чүпүрөк менен сүртүп, кийим илгичке илип, бөлмө температурасында кургатуу керек. Өтө ысык же күндүн нуру тик тийген жерде кургатуу булгаарынын сапатын начарлатат.
• Эгер үтүктөө кажет болсо, анда өтө дыкаттык менен мамиле кылууңуз абзел. Ички бетинен жана бир нече кат даки үстүнөн төмөнкү температурада гана үтүктөңүз.
• Булгаары буюмдарды маал-маалы менен глицерин же вазелин менен майлап туруу кажет. Ал эми өңүн жоготуп бараткан эски булгаары сырт кийимдерди апельсиндин кабыгы менен сүрүп коюуга болот. Бул ыкма булгаарыны жалтыратып коёт.
• Эч убакта полиэтилен баштыгына салып сактабаңыз! Сырт кийимиңизди сандыкка саларда булгаарыларды беттештирбегенге аракет жасаңыз. Антпесеңиз боёктору сиңишип, чамбыл-ала түскө ээ болуп калышы мүмкүн.
• Кокусунан булгаары сырт кийимиңизди бир нерсеге чийдирип алсаңыз, анда аны түспөлдөш боёк менен боёңуз да, кургаган соң май менен майлап коюңуз. Ал эми булгаарынын бир жерин илдирип (айрып) алсаңыз, анда анын ички бетине калың чүпүрөк же жука булгаары коюп, айрылган жерди клей менен жабыштырыңыз. Андан соң боёп, майлап коюу абзел.

БУЛГААРЫ КИЙИМДЕРДИ ТАЗАЛОО

• Эч убакта булгаары сырт кийимдерди жуубаңыз. Себеби булгаары катуу болуп жана өңүн жоготуп коёт. Ал эми кээ бир тактар кетпей да калышы толук ыктымал.
• Эгер булгаары кийимиңиз булганып калган болсо, чүпүрөктү жылуу сүткө малып, аны менен сүртүү кажет. Бул ыкма булгаарыны тазалайт жана жумшартат.
• Булгаары кийимди тазалоонун эң жөнөкөй жана жеңил жолу бул – самындуу сууга чүпүрөктү малып, тазалоо. Бирок мындай тазалоодон соң сөзсүз майлоо керек. Анткени самын булгаарыны катырып коёт.
• Булгаарыны тазалоодо эч убакта ацетон же бензинди колдонбоңуз! Булар булгаарыны күйгүзүп жиберет.

Эскертүү! Кандын, майдын же боёктун тактарын дароо тазалап, кетирбесеңиз, такыр кетпей калуу коркунучу бар. Андыктан тактын пайда болгонуна капа болуп кала бербестен, тезинен чара көрүүңүз зарыл!

• Ал эми булгаары бую­муңуз өтө кымбат баалуу болсо жана аны тазалоодон коркуп жатсаңыз, анда химиялык тазалатууга бергениңиз оң.

Салтанат Мукасова
kenesh@super.kg