• Кыргызстанда Курман айт болжол менен 7-ноябрда белгиленерин Мусулмандар дин башкармалыгынын басма сөз катчысы Максат Мамбеталиев айтты. Так датасы айтка он күн калганда жарыяланат.
• “Манас” эпосу азербайжан тилине которулду.
• “Түндүкэлектр” ААКсы электр жарыгын туура эмес же уурдап колдонгондордон 12 миллион 327 миң сом төлөттүрүп алды.
• “Парламентке өлкөдөгү чукул кырдаалды жарыялоо укугун берүүгө каршымын. Алар каникулда же командировкада болсо, 120 депутаттын топтолушу, анан дагы маселенин каралып бүтүшү өтө оор”,- дейт УКМКнын төрагасы Кеңешбек Дүйшөбаев.
• 2009-жылы өлтүрүлгөн журналист Геннадий Павлюктун өлүмүнө күнөөлүү деп Казакстанда эки казак жараны: Алмаз Игиликов 10 жылга, Шалкар Уразалин 11 жылга камалып, кыргыз жараны Алдаяр Исманкулов 17 жылга катуу режимдеги колонияга отургузулду.
• 2012-жылдын 1-январынан тарта күнү-түнү акысыз түрдө 112 номери Ош жана Бишкек шаарында ишке кирет. Тургундарыбыз 101, 102, 103, 104 жана газдын авариялык кызматына чыга албаган учурда 112 номерине чалып тез жардам сурай алышат.
• “Коопсуздук максатында депутаттардын телефондорун тыңшоого уруксат берели”,- деп сунуштады депутат Ирина Карамушкина.
• Нарын облусуна караштуу Жумгал районундагы М.Алыбаев атындагы орто мектептин көмүр сакталчу кампасындагы 336 тонна көмүр күйүп кетти.
• “Кыргызстанда жыл сайын жолдорду куруу жана оңдоого 1,5 миллиард сом керектелет. Учурда өлкөбүздө 34 миң чакырым жол бар, анын 5 миң чакырымы асфальтталган”,- деди Роза Отунбаева Чүйдөгү асфальт-бетон заводун ачуу аземинде.
• “Дордой” базарында 15 миңдей ишкер иштейт, бирок 8 миңи гана патент алат. Ошондон улам азыр салык кызматында штаттан тышкары иштеген кызматкер бир жылдын ичинде “Дордойдон” салык жыйноодон хан сарай кура алат”,- деп билдирди депутат Кенжебек Бокоев.
• 20 жылдан бери алгачкы жолу мамлекет тарабынан каражат бөлүнүп, Баткен шаарынын 25 жолу ремонттолду.
• 2011-жылы 9 айдын ичинде Кыргызстанга 1,5 миллион турист келген. Өткөн жылдын көрсөткүчү 1,2 миллионду түзөт.
• Кытай-кыргыз-өзбек темир жолун курууда кытай эксперттер тобу каржы маселесин, кыргыз эксперттер тобу техникалык жактан көзөмөл кылат.
• Президенттик шайлоого Тажикстандан 100 адам катышарын маалымдады Таджикстандагы кыргыз элчиси Урмат Саралаев.

Турдугүл Каримова
politika@super.kg