Түркия

ЖЕР ТИТИРӨӨДӨ КЫРГЫЗДАР КАЗА ТАБЫШТЫ
23-октябрда Түркиянын Ван провинциясында болуп өткөн 7,2 баллдык жер титирөөдөн 217 адам көз жумду. Каза тапкандардын ичинде 3 этникалык кыргыз бар. Айта кетсек, Ван провинциясындагы Улуу Памир айылында 2 миңге чукул этникалык кыргыз жашайт. Бул кырсык Ван шаарында түрмөдө отургандардын качуусуна өбөлгө түзүп, 150 кылмышкер абактан качып кеткен.

Аргентина

КРИСТИНА КИРШНЕР ИЙГИЛИГИ ҮЧҮН КАЙРАДАН ПРЕЗИДЕНТ
Аргентинада 23-октябрда өткөн президенттик шайлоодо учурдагы президент айым Кристина Фернандес де Киршнер жеңүүчү деп табылды. Шайлоонун алдын ала жыйынтыктары боюнча, 58 жаштагы мамлекет башчы шайлоочулардын 55 пайыз добушун алган. Көп добуш алуусунун себеби 2007-жылы ажо болгондон тарта экономиканы кыйла бутуна тургузуп, калкты социалдык жактан камсыздай алганына байланыштуу дешүүдө эксперттер.

Таиланд

ЖАҢЫ ОКУУ ЖЫЛЫ СУУ КАПТООДОН УЛАМ БАШТАЛА ЭЛЕК
Өлкөнүн 77 провинциясынын 28инде июль айында башталган суу каптоодон улам балдар мектепке бара албай жатышат. Таиланддын бийлик органдары 1-ноябрдан тарта окуу башталарын билдиришкен, бирок көптөгөн аймактар суудан арыла албай жаткандыктан, кайра 15-ноябрга жылдырылды. Азыркы тапта каза тапкандардын саны 356 адам, жабыр тарткандардын саны 2 миллион 460 миңге жетти. Таиланддын дарыяларындагы суу декабрдын башында азайып, суу каптоо токтойт деген үмүт бар.

Кытай

ТЕМИР ЖОЛДУ КУРГАН АШПОЗ
Кытайда темир жол куруу долбоорлорунун 70 пайызы убактылуу токтотулду. Анткени эл ичинде уу-дуу кепти Гирин провинциясында темир жол куруп жаткан “Рейлвей №9 груп” компаниясы курулуштун башчылыгына ашпоз Лу Тяньбону дайындаганы жаратты. Ал 2010-жылы темир жол өтүүчү көпүрөнү бул тармакта адистиги жок мигранттардын жардамы менен курган. Анын үстүнө көпүрө куруп жаткан жумушчулардын бири “бул жол менен жүрүүчү поездге эч качан отурбаймын” деп айткан.

КМШ

КАЗАКСТАН, КЫРГЫЗСТАН ЖАНА ӨЗБЕКСТАН – ЖОГОЛГУС ӨЛКӨЛӨР
БУУ жүргүзгөн изилдөөгө ылайык, кыргыз, казак жана өзбектер дүйнөдө түбөлүккө жашашат. Ал эми 83 өлкө жакынкы аралыкта жер жүзүнөн жоголот. Орусия 2888-жылы калкынын саны азайып отуруп, жок болууга дуушар болот. Андан соң Бириккен Араб Эмираттарына өтүп, кийин кырылуу процесси Батыш өлкөлөрүн, Вьетнам жана Мьянмини кучагына алат. Ал эми 3700 жылдан ашык тарыхка ээ Кытайдын дагы 1500 жылдык өмүрү калды дешүүдө. Адистердин айтымында, кайсы өлкөдө кыздар көп төрөлсө, ал өлкө жок болуу коркунучунан арыла алат.

Казакстан

БАУРДАСТАР “КЕТСИН!” ДЕП КЫЙКЫРЫШУУДА
"Өкмөт башчы Карим Масимов кетсин!” деген талап менен 25-октябрда Алматы шаарынын 8 миңден ашуун студенти Казакстандын президенти Нурсултан Назарбаевге кат жөнөтүшкөн. Студенттер 2007-жылдан бери премьер-министрликти аркалап келген Карим Масимовду Казакстанды Бажы союзуна киргизгендиги үчүн иштен кетүүсүн талап кылышты. “Орус эксперттеринин айтымында, Орусия 2017-жылы Бажы союзунун негизинде СССРди түзөт. Ошондон улам бул союз кымбатчылыкты гана алып келбестен, эгемендүүлүккө да шек келтирет”,- дешет студенттер.

Турдугүл Каримова
koom@super.kg