Былтыр болуп өткөн референдумга ылайык, президент Роза Отунбаеванын мөөнөтү 2011-жылдын 31-декабрында аяктамак. Бирок шайлоонун расмий жыйынтыгы канчалык эрте жарыяланса, ажо айым ошончолук батыраак такты бошотуп берери айтылууда. Бул ноябрдын ичинде болуп калышы толук ыктымал.
БШК президенттик шайлоонун расмий жыйынтыгын бул аптанын аягына чейин жарыялай тургандыгын билдирди. Демек, бир жарым жыл мурун Роза Отунбаеванын мойнуна илинген каамыт жакынкы күндөрдө жаңы кожоюндуу болуп калат. Шайлоонун жыйынтыгы жарыяланган соң Отунбаева президенттикти өткөрүп бергичекти Алмазбек Атамбаев өкмөт башчылык жумушуна киришерин КСДПнын штабы кабарлады.
Эске салсак, премьер-министр шайлоого катышуу үчүн кызматтан убактылуу кеткен. Андыктан инаугурациялык салтанатка чейин Алмазбек Атамбаев өкмөт башчынын кызматын ээлей турат. Президенттикке киришкенден кийин деле жаңыдан парламенттик коалиция түзүлүп, кайрадан өкмөт башчы шайланганга чейин Алмазбек Атамбаевге эки тизгинди бирдей алып кетүүгө туура келет.