Ош шаарынын өздүк милициясын түзүү боюнча мэр Мелис Мырзакматовдун сунушу катуу талкууга алынууда. Бир тарап «Мелис Мырзакматов өзүм билемдик кылып жатат» десе, экинчилер «бул жакшы идея» деп колдошууда.

Өмүрбек Текебаев, ЖКнын депутаты:
– Муниципалдык милицияны түзүүгө бүгүнкү күндө укуктук негиз жок. Бирок бизде жергиликтүү башкаруу органдарынын тартипти сактоодогу функциясын жана мүмкүнчүлүгүн кеңейтели деген ой-пикирлер бар. Бул өз алдынча Ички иштер министрлигине баш ийбеген милиция түзүү дегендикке жатпайт. Жергиликтүү бийлик менен Ички иштер министрлиги макулдашылган иш алып барат дегенге байланыштуу болушу керек. Азырынча өкмөттө да, мыйзам чыгаруучуларда да ага уруксат берели деген ой жок.

Курсан Асанов, Ички иштер министринин түштүк аймагы боюнча орун басары:
– Барып-барып ИИМ реформаланат. Ички иштер министрлигинин структурасын өкмөт карап чыгып, Жогорку Кеңеш жактырат. Кандай өзгөрүүлөргө туш болбосун, милиция кызматынын бардык инстанциясы, мейли облустук, мейли шаардык, мейли айылдык, анын баары түздөн-түз Ички иштер министрлигине баш ийиши кажет. Жергиликтүү өзүн-өзү башкаруу органдарына баш ийген милиция кызматы болушу мүмкүн эмес. Ал мыйзамга туура келбейт.

Ал эми Мелис мырзадан жооп алууга мүмкүн болбоду. Башында “жыйындамын” деген, кийин чалганда телефонун көтөрбөгөн Мелис Жоошбаевич бизге эки мүнөттүк убакыт таба албады. Бирок маалымат агенттиктеринде сөзүн оңдоого жетишип, өткөн жолку айтканын «кабарчылар туура эмес түшүнүп алышкан го» дептир. “Бийликтин вертикалдуулугу боюнча биз түздөн-түз милициянын ишине кийлигише албайбыз. Милициянын шаардык бийликке баш ийгени оң”,- деген. Ошол эле учурда: “Аны мен түзөм деп айткан жокмун. Болгону, бизде ушундай идея бар деп айттым. Кыргызстандын ар бир эле шаарында ушундай милиция түзүүгө болот”,- дептир мэр.