Дабасы жок ооруга дарыгерлердин шалаакылыгы менен кабылган он чакты баланын энелери 3-8 жаштагы балдарын ээрчитип нааразычылык акциясына чыгышты. Акция Ош шаарынын Облустар аралык балдар клиникасынын алдында өттү. СПИД илдетине чалдыккандар мамлекет тарабынан 1 миллион сом акчалай каражат жана үй бөлүнүп берилишин талап кылышууда. Алар менен жолуккан Саламаттыкты сактоо министрлигинин өкүлү Динара Сагынбаева: “Үй жана каражат бөлүү биздин компетенцияга кирбейт. Ал эми силер күнөөлөгөн кызматкерлер азыр саламаттыкты сактоо тармагында иштеп жатышат. Соттун чечими чыкмайынча биз ал кызматкерлерге эч нерсе дей албайбыз”,- деп билдирди.
16-ноябрда алар Бишкек шаарына келип, Ак үйдүн алдында нааразычылык акциясын улантышты. Бирок “ач кадырын ток билбейт” демекчи, бир да аткаминер чыгып талаптарын угуп койбоптур. Эртеси да уланган митингге акыры төрага Ахматбек Келдибеков чыгып, күнөөлүү кызматкерлерди 15-20 жылга чейин эркинен ажыратуу боюнча мыйзам долбоору иштелип чыгарын билдирди.