Акыйкатчынын институту кыздарды ала качуу көйгөйүн көтөрүп, конференция өткөрдү. «Өлкөдө жыл сайын 15-16 миң кызды ала качышат. Алардын төрттөн биринин тагдыры ажырашуу менен аяктайт. Андыктан республикалык деңгээлде 2012-жыл «Кыздарды ала качууга каршы күрөшүү жылы» деп жарыяланышын сунуштайм»,- деп акыйкатчы Турсунбек Акун билдирди.
Мусулмандар дин башкармалыгынын муфтийи Чубак Ажы Жалилов: “Кызды уурдамак түгүл, мусулмандарда ат уурдагандын колун кесишкен. Эгер бул маселени чечүү менин колумдан келсе, кыз ала качкандарды өлүм жазасына тартмакмын”,- деди.
Мыйзам боюнча, кыз ала качкандар 3 жылга чейин эркинен ажыратылат. Аялдарга көмөк көрсөтүү борборунун башчысы Айгүл Алымкулованын айтымында, 2010-жылы ала качуу боюнча 20 кылмыш иши козголуп, анын 8и гана жаза алган.
Маалымат үчүн: Кыргызстанда күнүнө 32 кыз күч менен ала качылат, анын алтоосу жыныстык кысымга кабылат.