Мындай жакшы жышаандын белгисин баштаган астролог Андрей Рязанцев келе жаткан жылга карата өз төлгөсүн маалымат жыйынында айтып берди. “Кыргызстан үчүн кийинки жыл жакшы болот. Экономика жана саясатта кардиналдуу өзгөрүүлөр күтүлөт. Өлкө жакшы түшүм жыйнайт. 2012-жыл – мүмкүнчүлүктөрдүн убактысы, андыктан акыл-эске таянып, аны туура пайдалануу керек”,- дейт ал.
Анын айтымында, жылдыз белгиси боюнча Бийкеч Алмазбек Атамбаев үчүн эмдиги жылдын жай мезгили өзгөчө ийгиликтүү болот. Маанилүү эл аралык келишимдерге кол коюлушу ыктымал. “Башталыштын көпчүлүгүн ийгилик коштойт, андыктан Алмазбек Атамбаев үчүн 2012-жыл анын саясий карьерасына жакшы пайдубал боло алат”,- дейт астролог.
Астрологдун айтымында, Арстан жылдызындагы Роза Отунбаевага Ажыдаар жылы кызыктуу долбоор сунуштайт. Эгиздер жылдызы алдында төрөлгөн Ахматбек Келдибековду оор жыл күтөт, андан досторунун колдоосу менен гана чыгып кете алат. Текечер жылдыз белгисинде төрөлгөн Өмүрбек Текебаевди 2012-жылда жагымсыз маанай көбүрөөк күтөт экен, бирок өзүнүн позициясын бекемдеп алууга шарттар түзүлөт дейт.
Ал эми “келе жаткан жылы кыямат болот экен” деп чочулагандарды: “Эч кандай андай болбойт. Астрология илими боюнча, Күн галактиканын борборунан өтөт. Бул 26 миң жылдык доордун же бир галактикалык жылдын гана аякташын билдирет”,- деп жоошутту.