Атактуу жести менен кыргыз тарыхында кала турган УКМКнын экс-шефи Мурат Суталинов кайдан-жайдан, болгондо да 7-апрель окуясы боюнча жүрүп жаткан сот залында пайда болду. Учурдагы УКМКнын, судьянын Суталиновдун кайдан пайда болгонун “билбей калышканы” күлкүнү гана келтирет. Атүгүл Интерполдо издөөдө жүргөн Суталиновдун “өз эрки менен” сотко келгенин “эрдик” деп баалап жибергендер да болду.

СУТАЛИНОВДУ СОТ БАЙКАБАЙ КАЛЫП...
Ушунча элдин ыйы, каргышы, анан да бийлик-мансабын заматта жоготуп алуу оңой эмес да. Чачын буурул баскан Мурат Суталиновду абдан жакшы билген Өмүрбек Текебаев да тааныбай калыптыр. Сот Дамир Оңолбеков да аны байкабай калгандыгын айтууда. Бирок судьянын кебине ишенүү кыйын. Алдын ала сүйлөшүү болбосо, эл аралык издөөдө жүргөн адам эч нерсе болбогондой сот залына келип, башкалардын катарында бейкапар отура алмак эмес.
Жабырлануучулардын бири Суталиновдун отурумга катышуучулардын катарында отурганына нааразы болуп чыр чыгарганда гана аны залдагы темир торго киргизишти. Ал “Ак үйгө карай бет алган көтөрүлүшчүлөрдү атууга буйрук берген” деп күнөөлөнгөндөрдүн катарында. Бул күнү соттук отурумда мурунку Убактылуу өкмөттүн мүчөсү, азыркы депутат Өмүрбек Текебаев жабырлануучу катары жооп берди. Апрель окуясы Өмүрбек Текебаев баш болгон оппозициянын бир нече өкүлүн УКМКнын абагына камап коюудан башталганы, ал кезде бул органды Мурат Суталинов жетектеп турганы жалпыга белгилүү.

БУТ КИЙИМ МЕНЕН УРУУ МОДАДА
Күбө катары чакырылган акыйкатчы Турсунбек Акун жооп берип жаткан кезде залды дүрбөткөн окуя болду. Мурат Суталинов суроо берейин деп ордунан турары менен жабырлануучулар тараптан бут кийим ыргытылып, дарегине жетпей жерге түштү. Бул “чабуул” менен катар “Суталиновго өлүм!” деген сөздөр айтылып, дүрбөлөң ИИМдин атайын даярдыктагы жоокерлеринин кийлигишүүсү менен жөнгө салынды.

СУТАЛИНОВ ҮЙ КАМАГЫНА ЧЫГАРЫЛДЫ
Жабырлануучулардын нааразычылыктарынан улам Мурат Суталиновдун адвокаты Кубанычбек Ташбалтаев үй камагына чыгаруу өтүнүчүн билдирди. Адвокат анын сотко өз эрки менен келгенин, өлкөгө сиңирген эмгегин жүйө кылды. Ал эми сот Суталиновду туруктуу жашоочу жери болуп, жашы жете элек бала менен энесинин жалгыз багар-көрөрү экенин эске алып, баш коргоо чарасын үй камагына алмаштырды.
Карачы, айрым адамдар үчүн мындай маселе кандай бат чечилерин?! Ушундай эле жүйөлөрү бар айрым айыпталуучулар соттун мындай чечимин айлап күтүшөт эмеспи. Алыс кетпей, ден соолугу кескин начарлап кеткен Данияр Дунгановду эле эске алалы. Соттун мындай чечиминин туура эмес экенин Алмазбек Атамбаевдин жардамчысы Фарид Ниязов да айтып чыкты. “Соттун эшигин тээп кирген адамды камакка алып, бир нече сааттын ичинде кайра үй камагына чыгарганы сот системасы үчүн уят нерсе”,- дейт ал. Саясий серепчилер мындан да түшүнүктүү комментарий беришүүдө. Алардын бири “эртең эле биздин заман да келет, ошондо кантесиң?” деп кекетишет. Соттор эртеңинен коркуп, булардын сураганын орундатышат” деп билдирди.

“КЫРГЫЗСТАНДА ЭЛЕ ЖҮРСӨ КЕРЕК”
Буга чейин Мурат Суталинов башкалар сыяктуу эле “башка өлкөгө качып кетти” делинип, Интерпол аркылуу эл аралык издөө жарыяланган. Мындай адам кандайча чек арадан билинбей өтүп кетти? Атүгүл буга чейин кээ бир булактар анын Казакстанда жашап, бизнес менен алектенип жатканын жазышкан эле. УКМКнын жаңы башчысы Шамиль Атаханов Суталиновдун чек ара постторунан өткөнү катталган эместигин айтты. “Чек арадан өткөн эмес. Ал Кыргызстандын эле аймагында жашынып жүрсө керек”,- деди ал. Балким, Жаныш Бакиев деле Кыргызстандын аймагында эле жашырынып жүрбөсүн? Эртең ал дагы сот отурумунда пайда болсо, таң калбай калдык көрүнөт.