Сабак өтүүнүн жүрүшүнө жана сапатына байкоо салуу үчүн Ош Мамлекеттик университетинин айрым лекциялык аудиторияларына видеокамералар орнотулду. Бул видеобайкоо эксперимент катары коюлуп, эгер өзүн актаса, анда окуу жайдын бардык факультеттерине жайылтылмакчы. Аталган ЖОЖдогу компьютердик борбордун директору Уланбек Сопуев: “Видеобайкоонун жазуулары ОшМУнун ички локалдык тармагына кошулган. Аны көрүүгө факультеттин деканында, окуу бөлүмүндө, ректор менен окуу иштери боюнча проректорунда мүмкүнчүлүк бар. Кайсы окутуучу кандай сабак өтүп жатат, сапаты кандай, ким кайсы учурда сабакты баштады, бардыгын байкап турууга шарт бар”,- дейт.
Эми окуу жайдын окутуучулары “камералуу” аудиторияларга өз убагынан кечикпей келүүгө тырышып, студенттер китептен баш көтөрбөй окуй турган болсо, анда бир жыйынтыгы көрүнөр.