Күтүүсүз жоруктары менен элди эриктирбес коомдук ишмер Азимбек Бекназаров азыркы бийликке ичи жылыбагандардын сап башында. Анын айтымында, коалициялык макулдашуу Баш мыйзамды бузуу менен жазылды. Эгер бийликке жетүү жолу дагы эле Конституцияны бузуу менен улана берчү болсо, анда Ак үйдүн алдына элдин агылып келер күнү алыс эмес.
Азыркы кырдаалга баа берген ал: “Кыргызстандын Конституциясында “мырзалык” жана “жашыруун макулдашуу” деген пункттар жок. Биздин саясатчыларга кызыкчылык боюнча эмес, мыйзамга ылайык жашоого убакыт келди. Коалициялык макулдашуу өлкөнүн негизги мыйзамын бузуу менен жазылды. Анда “коалицияга депутаттар эмес, фракциялар гана кире алат” деп жазылган. Бийликти алыш үчүн парламенттегилер бардыгына барып жатышат, ушул мени кооптондурууда”,- деп фракциялык келишимге баш бербеген айрым өзүмчүл депутаттарга таш ыргытты. Саясатчы “азыркы парламентти таркатып жиберүү туура” деген пикирин билдирди.