Азыр элдин баары саясатчы, тили чыккан баладан эңкейген карыга чейин. Ушундай саясатташып кеткен өлкөбүздөгү кезектеги интрига улуу жазуучу Төлөгөн Касымбековдун уулу Райкан Төлөгөновдун тегерегинде болуп жаткан кези.
“Ата Мекен” партиясынын депутаты Райкан Төлөгөнов 7-апрелде талап-тоноого катышып, атүгүл башка катышуучуларга кайсы жерди тоноо керек экени боюнча буйрук берип, экс-муфтий Мураталы ажы Жумановду коркутууну буюрган”,- деп Айсулуу Дүйшөнкулова аттуу аял айтып чыккан. Мураталы ажы Жумановду коркутууга 20 чакты адам барып, муфтийликтен алып, “бул жерге экинчи жолобойсуң” деп да коркутушканын баяндайт ал. Эске салсак, Мураталы ажы дайынсыз жоголуп, кийинчерээк жүрөгү токтоп, 37 жашында сырдуу өлүмгө кабылган. Мураталы Жумановдун жоголушуна, талап-тоноого шектүү деп Дастан Оморов, Алдулла Юсупов жана Азамат Шергазиев дегендер кармалып, азыр тергөө изоляторунда отурушат.
“Ата Мекенге” каршы чабуул муну менен эле токтолбой, өзүн Апрель окуясынын катышуучусумун деп тааныштырган Нуриса Табылдиева "Райкан Төлөгөнов, Өмүрбек Текебаев, Болот Шер 7-апрелдеги мародёрлукту башкарышкан",- деп билдирди.
Минтип октой жааган күнөөлөөлөрдү депутат Райкан Төлөгөнов жалган жалаа деп билдирет. “Каралоо үчүн каршылаштарым ушунчалык пас деңгээлдеги адамдарды пайдаланып жатышат”,- деди ал. “Оор кылмыш менен айыпталып СИЗОдо жаткан бул үч адамдан каалагандай көрсөтмө алышууда” деп эсептейт Райкан мырза. Депутаттын айтымында, бул нерселердин баары президенттик шайлоодо Өмүрбек Текебаевди каралоо үчүн даярдалып, бирок Өмүрбек мырза талапкерлигин алып салгандан кийин Райкан мырзага каршы колдонулууда.