“Бүтүн Кыргызстан” партиясынын лидери Адахан Мадумаров биздин гезиттин окурмандары менен болгон түз байланышта Камчыбек Ташиев менен бириккенин жарыялаган болчу. Андан соң “Бүтүн Кыргызстан” партиянын кезексиз жыйынында таркатылды” деген кеп тарады. Элде “демек, Адахан Мадумаров жана анын пикирлештери “Ата Журт” партиясынын курамына кирди да” деген пикир жаралды.
Чын-төгүнүн билүү үчүн Адахан Мадумаровго байланыштык. Адахан мырза учурда чет өлкөдө жүргөнүн билдирген анын жардамчылары мындай маалыматтын чындыкка жатпасын, “Бүтүн Кыргызстан” партиясы тарабаганын айтышты. “Ата Журт” жана “Бүтүн Кыргызстан” партиялары оппозициялык багытта биргеликте иш алып барууну макулдашышкан. Эми эки партия бир канча майда партияларды ичине камтып, жаңы партия түзмөкчү экенин, жаңы партиянын аты жана лидери кийинчерээк аныкталарын кошумчалашты.