2007-жылга чейин президент жана өкмөт Ак үйдө отуруп, Жогорку Кеңеш Абдумомунов көчөсүндөгү имаратка жайгашкан болчу. Депутаттардын саны 120га көбөйгөндөн улам ЖК Ак үйдүн имаратына көчүп келген. Бирок жети кабаттуу Ак үй айрымдарга тардык кылып жатат. Мындан улам Бюджет жана каржы боюнча комитеттин башчысы Ахматбек Келдибеков Президенттик аппараттын кызматкерлери кошуна жайгашканына кабатырланды. Анын айтымында, Баш мыйзамга ылайык, бийликтин эки бутагы бир имаратта жайгашса болбойт. Ошондуктан депутат "президент аппараты менен качан башка имарат табат?" деди. Учурда ансыз да мамлекеттик имараттар жетишсиз болуп жаткан кез. Имараттын жоктугунан Башкы прокуратура да бир кезде Майрам Акаеванын конок тосуу үчүн даярдалган эки кабаттуу үйүн алган.